Bəzi insanlar bu dünyaya sadəcə yaşamaq üçün deyil, yaddaşlarda silinməz izlər qoymaq, adlarını tarixə qızıl hərflərlə yazdırmaq üçün gəlirlər. Ömrünü həm incəsənətin incəliyi, həm də Vətən sevgisinin sonsuz əzəməti ilə bəzəyən belə qəhrəmanlarımızdan biri də şəhid leytenant Ravil Hümbətovdur.
Onun ömür yoluna və yarım qalan arzularına boylananda, Ravil Hümbətovun 10 yanvar 1987-ci ildə Cəbrayıl rayonunun Yarəhmədli kəndində dünyaya göz açdığını görürük. Mübariz müəllim və Minayə xanımın ocağında böyüyən, ailənin sevimlisi, bacısı Sevilin və qardaşı Əfqanın fəxri olan Ravil içindəki yaradıcılıq eşqi ilə Azərbaycan Dövlət Mədəniyyət və İncəsənət Universitetinə (ADMİU) qəbul olmuş və buranı uğurla bitirmişdi.
O, ruhən incə bir sənətkar, həyatda isə gözəl bir ailə başçısı idi. Ömür-gün yoldaşı Leyla xanımla birlikdə böyütdükləri iki mələyi Şəms və Melisa adlı qızları onun dünyası, ən böyük sevinci idi. Lakin Vətənin səsi ucalanda, o, sənət məbədindən və doğma ailə ocağından birbaşa döyüş meydanına, ən müqəddəs zirvəyə doğru addımladı. İncə sənət ruhlu bu gənc, lazım gəldiyi anda poladdan daha möhkəm bir sərkərdəyə, rəşadətli bir zabitə çevrildi.
2022-ci il sentyabrın 12-də mənfur düşmənin törətdiyi genişmiqyaslı təxribatların qarşısının alınması zamanı leytenant Ravil Hümbətov ön cəbhədə idi. O, tabeliyindəki əsgərlərlə birlikdə düşmən hücumunun qarşısını mərdliklə kəsdi. Hərbi hissə qarşısında qoyulmuş ən çətin tapşırıqları şərəflə, qorxu bilmədən yerinə yetirdi. Vətən torpağının hər qarışı üçün canını sipər edən Ravil, bu qeyri-bərabər döyüşdə qəhrəmancasına şəhid oldu. “Torpaq, əgər uğrunda ölən varsa, Vətəndir!” fəlsəfəsini o, öz qanı ilə sübut etdi.
Dövlətin və millətin sonsuz ehtiramı olaraq, Ravil Hümbətovun göstərdiyi misilsiz igidlik və rəşadət yüksək qiymətləndirildi. Azərbaycan Respublikasının ərazi bütövlüyünün bərpa edilməsi uğrunda gedən döyüşlərdə vəzifə borcunu canı bahasına yerinə yetirən şəhidimiz, ölümündən sonra mühüm dövlət mükafatları ilə təltif edildi:
Vətən qarşısında göstərdiyi müstəsna xidmətlərə və şücaətə görə “Azərbaycan Bayrağı” ordeni.
Azərbaycanın ərazi bütövlüyünün qorunmasındakı fədakarlığına görə “Vətən uğrunda” medalı.
Ravil Hümbətov bu gün təkcə doğulduğu Cəbrayılın deyil, bütöv Azərbaycanın fəxridir. O, bu gün Şəms və Melisanın ömür boyu qürurla anacağı Qəhrəman Ata, Hümbətovlar ailəsinin əbədi iftixar mənbəyidir. Universitet auditoriyalarından başlayan ömür yolu, bu gün uca bir millətin qəlbində əbədi məskənə çevrilib.
Ruhun şad,məkanın cənnət olsun, cənab leytenant!
Sənin Vətən eşqin, şərəfli adın hər zaman yaşayacaq və bizə əmanət qoyduğun ailən hər zaman başımızın tacı olacaq!
Məcidova Leyla Qadir qızı Lənkəran Dövlət Universitetinin dosenti,Tarix üzrə fəlsəfə doktoru,Lənkəran Tarix-Diyarşünaslıq Muzeyinin direktoru
